Cesga

 3 voto(s)

Xoves 26/04/2012 12:49

Coñecer nun instante a través do móbil "a predición do tempo para calquera punto de Galicia", explica o director de Meteogalicia, Vicente Pérez Muñuzuri, é xa unha realidade grazas a aplicación MeteoSIX Mobile deseñada polo Servizo de Predición Meteorolóxica da Consellería de Medio Ambiente, o CESGA e as universidades de Santiago e A Coruña. Meteogalicia elabora estes e outros prognósticos grazas á gran cantidade de datos recolleitos de múltiples puntos de observación que se procesan no Centro de Supercomputación de Galicia (CESGA).

Unha das vantaxes de MeteoSIX Mobile, creada para móbiles con sistema operativo Android, é que podemos coñecer rapidamente as predicións para calquera lugar, en terra ou no mar, aínda que non saibamos o seu nome, pois o propio móbil a través do sistema GPS detecta o sitio onde se atopa e obtén o prognóstico do tempo para esa área. Conseguir predicións tan axustadas e precisas como as que se requiren é posible grazas á gran capacidade de cálculo do supercomputador 'Finis Terrae' do CESGA, no que se procesan a diario os datos de modelos meteorolóxicos e oceanográficos que utiliza o persoal de Meteogalicia. Nos próximos meses Meteogalicia pensou estender as capacidades da aplicación incorporando datos de observación, incluíndo o radar meteorolóxico e a programación noutras plataformas como a de móbiles iPhone.

Proxecto RAIA: Galicia e Norte de Portugal
Noutro dos proxectos recentes de Meteogalicia, RAIA (www.marnaraia.com), que conta con financiamento europeo a través do programa Interreg Galicia-Norte de Portugal, os modelos non só abarcan o territorio galego senón tamén o Norte de Portugal, e máis en concreto a zona costeira. Neste momento trece socios están a participar en RAIA co obxectivo final de crear un observatorio mariño e do litoral no que os usuarios poidan obter información de todo o que acontece no océano no oeste da Península Ibérica no ámbito da meteoroloxía e oceanografía.

A posta en marcha de varias aboias novas para a obtención de datos no mar, así como modelos oceanográficos e novos protocolos de intercambio de datos permitirán ofrecer información máis detallada sobre a calidade das augas nas costas galegas, información idónea para os portos de interese turístico, temperatura das augas de baño ou datos para a atracada de barcos nos portos galegos ou do Norte luso. Actualmente os socios están a desenvolver aplicacións específicas para usuarios finais destes desenvolvementos para percebeiros, portos ou confrarías, entre outros.               

Meteogalicia
Meteogalicia, Servizo Meteorolóxico da Xunta de Galicia, dependente da Consellería de Medio, Territorio e Infraestruturas, nación en 1999 froito dun Convenio coa USC. Meteogalicia consta de catro grandes áreas: predición operativa, predición numérica, climatoloxía e observación e a área de Tics. 

http://www.meteogalicia.com
http://www.meteogalicia.es/web/proxectos/meteosix.action
http://www.observatorioraia.org

CESGA
O Centro de Supercomputación de Galicia (CESGA) que depende da Consellería de Economía e Industria da Xunta de Galicia e do Consello Superior de Investigacións Científicas (CSIC), é un organismo cunha traxectoria de máis de 19 anos. O seu obxecto é investigar, fomentar e difundir servizos de cálculo intensivo e comunicacións avanzadas ás comunidades investigadoras galega e do CSIC, así como a aquelas empresas ou institucións que o soliciten.
www.cesga.es

Para maior información, contactar con:
Vicente Pérez
Director de Meteogalicia
881 999 658
administracion@meteogalicia.es