Cesga

 2 voto(s)

Martes 17/04/2012 16:03

Os estudos do Panel Intergobernamental do Cambio Climático (IPCC) creado pola ONU no 1988 advirten desde hai anos dos riscos que supoñen para os ecosistemas e para as propias persoas un excesivo quecemento da atmosfera debido á acción humana.

Pero as súas predicións realízanse mantendo como fixa a cantidade de radiación solar que recibe a Terra, aínda que esta é variable. Agora, un proxecto desenvolvido conxuntamente pola Universidade de Vigo, a Universidade Complutense de Madrid, o National Center for Atmospheric Research dos Estados Unidos e a universidade británica de Oxford está a realizar no Centro de Supercomputación de Galicia (CESGA) simulacións máis avanzadas que contemplan esta variabilidade.

O ourensán Juan Antonio Añel, xefe de investigación en climatoloxía da Smith School of Enterprise and the Environment da universidade británica de Oxford, lembra que as simulacións da incidencia da actividade solar no clima terrestre "requiren modelos climáticos moi detallados para aplicar diferentes condicións de radiación solar", o que supón un uso intensivo dunha gran capacidade de cálculo como a do supercomputador 'Finis Terrae' do CESGA: este proxecto é un dos máximos consumidores de horas de cálculo do centro.

Historicamente, o episodio coñecido como mínimo de Maunder -que sucedeu entre 1645 e 1715-, caracterizouse por unha menor presenza de manchas no Sol e por unha radiación solar constante e menor da actual, tendo como efecto un menor quecemento da atmosfera duns poucos graos.

Isto non parece moito pero si o é ter en conta que é admitido que un quecemento do noso planeta de dous graos sobre os niveis preindustriales considérase como perigoso. O doutor Añel subliña que "a novidade do noso proxecto é que non había simulacións que incluísen estes efectos de forma realista sobre o clima do futuro cun modelo a esta escala", e as que se realizan no CESGA empregan escenarios do IPCC pero aplicándolles distintas cifras de radiación solar para ver como un menor quecemento da atmosfera de orixe solar podería compensar o xerado pola humanidade.

Non está previsto que estas simulacións se integren nas análises do IPCC, xa que nestas contémplanse distintos modelos climáticos que deben ser comparables e habería que realizar o mesmo proceso con todos eles, pero si se contempla o seu uso en informes da Organización Meteorolóxica Mundial sobre comparación entre modelos de evolución do clima terrestre. A maior parte dos resultados do proxecto obteranse ao longo do ano 2013.

Pé de imaxe: A imaxe mostra o resultado das simulacións feitas no CESGA comparando un escenario moderado de emisións de dióxido de carbono cun similar e tendo en conta unha actividade solar constante. A liña violeta é o incremento de dióxido de carbono e pode verse como a radiación de onda curta que emitida cara abaixo desde o tope da atmosfera é variable segundo o ciclo solar de once anos no primeiro caso e constante no segundo.