O Centro de Supercomputación de Galicia (CESGA) tivo unha destacada participación no Congreso de Innovación na Formación Profesional 2025, organizado pola Xunta de Galicia o pasado 26 de marzo, un evento crave na difusión da innovación didáctica e tecnolóxica na que está inmersa a FP de Galicia.
No marco da mesa redonda titulada “Innovación e Internacionalización”, María José Rodríguez Malmierca, responsable do departamento de e-Learning do CESGA, presentou o proxecto FabLabs, que pretende o desenvolvemento de competencias no IoT (Internet das Cousas), a través de laboratorios de Fabricación Dixital.
A contribución esencial do CESGA a este proxecto materialízase no deseño e desenvolvemento dunha unidade formativa de “Introdución á Intelixencia Artificial”. Este módulo, integrado nos materiais do curso resultante do proxecto, está especificamente dirixido a profesores e estudantes de FP, así como aos usuarios dos propios FabLabs.
Cun enfoque eminentemente práctico, o módulo de IA concibido polo CESGA ten como obxectivo achegar os fundamentos desta tecnoloxía. A través de contidos accesibles, útiles e directamente aplicables nos ecosistemas educativos e no desenvolvemento dos seus proxectos innovadores.
Durante a súa intervención, María José Rodríguez Malmierca subliñou a crecente importancia da intelixencia artificial na educación técnica e profesional. Así mesmo, resaltou como o módulo desenvolvido polo CESGA contribúe de maneira significativa á modernización das competencias dixitais no ámbito da FP galega. A proposta do CESGA ofrece ferramentas concretas e metodoloxías innovadoras que poden ser integradas de forma efectiva tanto na dinámica da aula como no desenvolvemento de proxectos colaborativos dentro dos espazos FabLabs.
A participación do CESGA neste congreso reafirma o seu compromiso coa innovación e o seu papel como axente crave na transferencia de coñecemento e a capacitación en tecnoloxías punteiras para o futuro da Formación Profesional en Galicia.