A XUNTA SITÚA A GALICIA Á VANGARDA DA INVESTIGACIÓN E A INNOVACIÓN CO NOVO COMPUTADOR CUÁNTICO DO CESGA
— A conselleira de Economía, Industria e Innovación, María Jesús Lorenzana, participou na inauguración no Centro de Supercomputación de Galicia do computador cuántico con maior potencia instalado nunha instalación pública de I+D+i no sur de Europa
— A infraestrutura, que supón un investimento de 13,9 millóns de euros financiados pola Administración autonómica, estará aberta a todos os sectores académicos e empresariais
Santiago de Compostela, 2 de outubro de 2023.- A conselleira de Economía, Industria e Innovación, María Jesús Lorenzana, inaugurou hoxe no Centro de Supercomputación de Galicia (Cesga) o computador cuántico con maior potencia (32 cúbits) instalado nunha institución pública de I+D+i no sur de Europa. O computador estará aberto á investigación e á innovación de todos os sectores académicos e empresariais, e tal e como sinalou Lorenzana constituirá a principal infraestrutura do Polo de Tecnoloxías Cuánticas que está a impulsar o Goberno galego co obxectivo de colocar a Galicia á vangarda neste eido, apoiar o ecosistema innovador e atraer talento investigador.
A infraestrutura supón un investimento de 13,9 millóns de euros, financiados pola Xunta de Galicia con fondos do programa React UE do programa operativo Feder Galicia 2014-2020 dentro da súa aposta pola transición dixital do sistema produtivo e por contar coas mellores infraestruturas de investigación.
Tal e como apuntou Lorenzana, o novo computador cuántico permitirá ás empresas, centros tecnolóxicos e grupos de investigación mellorar a súa competitividade e produtividade ao acceder a unha ampla variedade de aplicacións que transformarán os seus procesos e mellorarán as súas estratexias de investimento, o que requirirá de persoal cualificado. Así, ponse en marcha nas tres universidades galegas a primeira edición do mestrado en cuántica.
Na súa intervención, a conselleira de Economía, Industria e Innovación avogou por converter a aplicación destas tecnoloxías nunha maneira de atracción de empresas e de desenvolvemento da súa competitividade, sinalando que as tecnoloxías cuánticas van transformar todos os sectores, entre os que citou a medicina, a aeronáutica, a biotecnoloxía ou as finanzas. Do mesmo xeito, sinalou a importancia da colaboración entre o sector público e o privado para avanzar na innovación e no crecemento económico.
O contrato con Fujitsu, adxudicataria da licitación do computador cuántico, inclúe diferentes infraestruturas complementarias, e un plan de colaboración que incorpora a posta en marcha do centro internacional de excelencia en tecnoloxías cuánticas en Galicia. A iniciativa enmárcase no Polo de Tecnoloxías Cuánticas de Galicia impulsado pola Xunta, no marco do cal se están a realizar investimentos por importe de máis de 30 millóns de euros.
Neste eido, vénse de poñer en marcha tamén a Rede Galega de Tecnoloxías Cuánticas, unha rede de colaboración entre a Administración, os centros tecnolóxicos e de investigación, as universidades e o sector empresarial para sumar esforzos e avanzar no liderado de Galicia nestas tecnoloxías.